477
15
ENCOMIVM WETTERAE
ATHENARVM HASSIAE.
LAVDABVNT alii Solymam, seu Persica Susa,
Cecropis aut vrbem, quae doctis artibus olim
Praestantes genuere viros, toto orbe celebres:
Tu tamen excelsis nuper circundata muris
WETTERA, quae veteri gaudes ita nomine dici,
Quâ Drusi miles sua castra vetusta locabat,
Tu BOLLINGERI meritò laudabere Musis.
Non quod te natura bonis donavit opimis,
Et tibi ditat agros foecundo copia cornu,
AEolus & mites, & sanas temperat auras,
Vnde laboriferis crescit vis strenua membris.
Quod tibi serta parant vario discrimine Nymphae
Plaudentesque agitant choreas, & Oreades hirtis
Cum Satyris ludunt, Dryadesque ibi frondibus altis
Vestitae sua regna tenent, & lustra frequentant.
Quod tibi progenies non infoecunda ferarum
In sylvâ, & rident circum frondentia tempe:
Omne volatilium genus est circumque supraque
Aethera mulcentum cantum, lucisque volantum.
Quod tibi descendunt largi de fontibus amnes
Pisciferique lacus (hinc fercula grata parantur)