477
18
ENCOMIVM.
Hic tardis ingens vbi SEQVANA flexibus errat
Dum sequeris Musas per binos sedulus annos
Hîc te sors rigido clausum sub carcere pressit.
Non equidem tales vnquam mala crimina poenas
Innocuo peperêre tibi, sed proditor hospes
Et tua pura fides in tanta pericula vitae
Te sociosque tuos posuit, iam triste parabant
Supplicium flammae: sed vos, mirabile dictu,
Faemina seruauit tanto in discrimine rerum.
Macte animo CROLLI, pietas sua praemia secum
Semper habet, iustisque viris non defuit vnquam
Rebus in aduersis, cum spes non vlla iuuandi,
Auxilium praesens stellanti ex aethere missum.
Nec te transierim LAELII qui nomine gaudes
Optime LAVRENTI, sacrâ dignissime lauru
Quam Themis imposuit, cui tu tam fidus alumnus.
Iam procul à patriâ te Consultore VISVRGIS
Vtitur, & BREMA sacrorum Praesul in vrbe.
At vos quos memorem quos vnica WETTERA multos
Protulit edoctos herbas, vsumque medendi?
Nuper erant gemini caro cum patre DRYANDRI,
Quae sit morborum propriissima caussa, quid artes
Efficiant medicae, quae vis operetur in herbis:
Quae virtutum ipsis DEVS incrementa ministret
Ipse pater docuit, patriis quàm proximus oris
Alter natorum mortalia tecta reliquit
Ante diem raptus: verùm alter in orbe remoto
Paeonium