477
ENCOMIVM.
20
Ille viros vidit, varias lustrauit & vrbes.
Inde sagax animi, longoque peritus ab vsu
Artibus instructus variis, varioque disertus
Eloquio rediit, seu disserat ore Latino
Seu Gallo, aut Italae promat commercia linguae.
Iam PAPPENHEMIO vitae morumque Magister
Additus est iuueni, cum quo dimissus ad vrbem
Germani proceres vbi convenêre sacrique
Sceptriger Imperii: rem dignam gessit vterque
Esset vt integritas captivi nota parentis
Quem sors dura premit, patriisque à sedibus arcet.
At tu qui tanti mensuram nominis imples
MAXIMILIANE [sic] puer praesentem exporrige frontem.
Iam iam tempus adest, priscum quo Caesar honorem
Restituet, patremque suam reuocabit in aulam.
Interea te Parnassum deducet in altum
CROLLIVS ille tuus carum quem nuper amicum
Hac Bebenhusaeâ mihi sors coniunxit in aede.
O quoties vnà totas consumsimus horas
Colloquiis laeti, & docti sermonibus oris!
Non quàm dulce femur lepori, quàm dulce palumbi
Sit latus, aut pernis, aut quae sit gratia triglis,
Sed qui sit pietatis honos, quae gloria doctis
Artibus, & quae sint Francae commercia linguae.
acceptum huic refero, si quid discernere possum
Gallorum voces, quarum praecepta loquendi
Tradidit ille mihi: Salue carissime CROLLI,
Cum